珍寶海鮮舫 - 香港

珍寶海鮮舫 - 香港

做咗一日遊客，去左香港一間好出名嘅水上餐廳食番餐晚飯😋 話說我呢d新界人就極少去香港仔果頭，所以今次係第一次去，好興奮呀😆(大鄉里出城) 去到碼頭可以免費坐船到達餐廳，入面嘅裝修比我想像中靚，keep得都唔錯 佢成個餐廳實係一艘好大嘅船，總共有三層😊服務都唔差 佢個menu有好多唔同嘅套餐可以俾你揀, 不過我去到就冇揀海鮮餐😂 反而比個4人京鴨餐吸引左,總共有六道菜＋1個甜品 ($1900 HKD)

第一道菜就梗係 - 京都片皮鴨

因為係四人餐片皮鴨嘅份量睇落唔多每人有兩至三塊

個鴨唔錯，好香，塊皮又脆 如果可以多d青瓜同醬就會更加好 d蔥切細啲就會最好
第二道菜 - 紅燒雞絲翅 其實冇乜特別 正正常常咁啦

第三道菜 - 百花炸蟹拑 呢個幾好味好彈牙 又夠味同好大粒 唔係講笑食一粒都真係幾滯

第四道菜 - 美果鮮蝦仁 個名咁靚其實即係西芹炒蝦 不過呢個好好味👍🏼佢d蝦好彈牙，好鮮味 絕對比出邊大部份嘅酒樓好食啲

第五道菜 - 菜片炒鴨鬆 呢度菜亦都幾好味 鴨鬆入邊加左啲馬蹄，好爽口 夾埋d菜，口感更加好 又唔會太滯 第六道菜 - 楊州炒飯 (話說我冇影相) 其實你都唔好話唔飽，所以呢個飯我只係食咗細細碗 飯炒得好靚，粒粒分明👍🏼所以拎左返屋企第二日食

最尾就係甜品凍香芒布甸 耐冇食過呢種布甸喇，細個去茶樓好鍾意食 呢個亦都唔差，芒果味都幾重 加埋淡奶就真係一流👍🏼 梳乎厘

呢個梳乎厘係另外叫嘅，如果想食嘅話記得一開始點餐嘅時候就要叫喇 係呀雖然我話好飽但係都要食兩個甜品😂 成餐飯都唔錯，不過呢個梳乎厘比到我最大嘅驚喜! 好 好 味 呀!🙀 卡士達醬個雲呢拿味好重! 個梳乎厘又真係好梳乎😋 認真推介! 地址： 香港仔深灣碼頭徑